1. Epe afnagpaley kiñe gobierno chem kellukenolu taiñ pu che ñi nor zugu mew, ka epe llitupaley kiñe we gobierno kayñetukefilu taiñ pu lof ñi nor zugu ka kayñetukefilu tati ixofill mogen ñi zugu. Kisu egün ñi rakizuam mew, feychi ramtukawe zugu (consulta) "katxütukey" ka "ñokiñtukey" tati pu wülkullin (inversiones).
2. Tati Comisión Presidencial para la Paz y el Entendimiento pigelu, rume weza zugu feypi tati mapu zugu mew fantepu: (epu waranka lof nielu aplicabilidad ka kake lof petu kintulu, müley ñi ügümal pura mari kam kiñe pataka kayu mari epu txipantu ñi llowal ñi mapu). Tüfachi zugu petu zewmagelay, tati pu lof llowkenolu feychi we rakizuam ramtukalu tati gobierno. Tüfa ta kiñe rume weza zugu taiñ pu küpalechi mapuche mogen mew.
3. Tati pu koneltulelu Consejo Nacional Conadi mew, müley ñi wegetual ka ñi zoy fütxalkünual ñi küzaw kimün ka ñi pepiluwün, femgechi ñi newentual tati wezake zugu mew. Turpu wiño rupalayay ñi llowgeal kiñe proyecto de presupuesto Conadi mew (chumgechi tati amulelu tüfachi txipantu mew) feypikünunolu tati pu Consejero Indígena (müley kiñe responsabilidad pegelgenolu).
4. Tüfachi wezake zugu rupalu rume rakizuamtukuenew iñche, welu zoy falin zugu ta tüfa: ka rakizuamtukufi fentxen pu wünenkulu ka pu kuyfike nor che fillke mapu mew tuwlu. Fey egün tañi nütxamkaniekefiel ka txawüzuguyiñ taiñ nentual tüfachi amulzugun (candidatura), nielu chem koneltuwün no rume tati pu partido político ñi zugu mew.
